Расейская металургія ўпала ў штопар
- 24.10.2024, 20:52
Расстат зафіксаваў абвальнае падзенне выпуску сталі, чыгуну і трубаў.
Адрэзаныя санкцыямі ад знешніх рынкаў расейскія металургічныя заводы, якія сутыкнуліся з рэзкім падзеннем экспарту, пачалі рэзка скарачаць вытворчасць, паведамляе The Moscow Times.
Паводле вынікаў верасня выпуск у Расеі сталёвага пракату скараціўся на 18,2% год да году, а выплаўленне чыгуну асела на 9,4%, паведаміў Расстат у справаздачы аб прамысловай вытворчасці. Паводле афіцыйнай статыстыкі, на 9,5% таксама ўпала вытворчасць сталёвых трубаў, а выпуск нелегаванай сталі абваліўся на 15,8%.
Назапашаным вынікам за 9 месяцаў Расея зрабіла 45,3 млн тонаў сталёвага пракату – на 5,3 млн тонаў, або на 6,3% менш, чым за той самы перыяд годам раней. Выплаўленне чыгуну на студзень – верасень скарацілася на 5,8%, да 38,4 млн тонаў; сталёвых труб – на 5, 2%, да 9, 6 млн тонаў.
«Зразумела, трэнд нездаровы і паказвае як на пагаршэнне сусветнай кан'юнктуры, так і на тармажэнне ўнутранага попыту», – адзначае галоўны стратэг ІЧ Вектар Капітал Максім Худалаў: адбіваецца, у тым ліку, скасаванне льготнай іпатэкі, якая справакавала крах попыту з боку забудоўнікаў.
Экспартныя рынкі пры гэтым закрытыя санкцыямі, падкрэслівае Худалаў. Паводле звестак РЧ, экспартныя адгрузкі металаў з Расеі за студзень – верасень упалі на 14,7%, да 16,1 млн тонаў. Найбольшыя страты панеслі прадпрыемствы ТМК – найбуйнейшага ў Расеі вытворцы сталёвых трубаў. Экспарт Волжскага трубнага завода ўпаў удвая, а Чэлябінскага трубапракатнага завода – на 60%.
«Поўначсталь» мільярдэра Аляксея Мардашова зафіксавала крах экспарту на 23%, заводы Evraz – на 14–21%, Магнітагорскі металургічны камбінат (ММК) – на 12%. Крыху менш экспарту – 4% – страціў Наваліпецкі металургічны камбінат (НЛМК).
Мінэканамразвіцця ў прагноз на гэты год закладвала рост выпуску сталі на 0,4 адсотка, а чыгуну і пракату – на 0,2 адсотка. Але ў цяперашняй сітуацыі «ёсць вялікія сумневы, што ў металургаў атрымаецца нагнаць адставанне за астатнія да канца года тры месяцы» кажа аналітык «Фінама» Аляксей Калачоў.
Сітуацыю для галіны пагаршае тое, што шмат таннай сталі на сусветным рынку прапануе Кітай, дадае эксперт.