Bloomberg: Краіны ЕЗ заклікаюць увесці маштабныя падаткі на імпарт з Беларусі

• 24.10.2024, 16:24

Размова ідзе аб сельскагаспадарчай і рыбнай прадукцыі.

Еўрапейскі Звяз абмяркоўвае пашырэнне загараджальных падаткаў на сельскагаспадарчыя і харчовыя тавары, а таксама ўгнаенні з Беларусі і Расеі. Аб гэтым са спасылкай на крыніцы піша Bloomberg (пераклад - liga.net).

Некалькі дзяржаў-чальцоў, якія імкнуцца абмежаваць даходы Крамля, заклікаюць блок увесці маштабныя падаткі на імпарт сельскагаспадарчай і рыбнай прадукцыі з Расеі і Беларусі ў ЕЗ у дадатак да больш высокіх падаткаў на збожжавыя прадукты, устаноўленыя раней сёлета.

Астатнія ж заклікаюць да асцярожнасці, папрасіўшы спачатку ацаніць уплыў якіх-небудзь захадаў на еўрапейскі імпарт і кошты прадуктаў харчавання, паведамілі крыніцы агенцтва.

Гандлёвыя абмежаванні не заўсёды патрабуюць падтрымкі ўсіх дзяржаў-чальцоў, у адрозненне ад санкцый.

ЕЗ усё яшчэ аналізуе, на якія тавары ён можа арыентавацца. Кожны крок што да ўгнаенняў, імаверна, будзе вітацца еўрапейскай галіной, зазначае агенцтва.