Камандзір спецыяльнага прызначэння «Ахмат» расказаў аб злачынствах расейскіх вайскоўцаў у Курскай вобласці

• 23.10.2024, 14:35

Алаўдзінаў здаў сваіх жа.

МУС Курскай вобласці (Расея) зафіксавала 187 злачынстваў, учыненых у рэгіёне расейскімі вайскоўцамі. Пра гэта распавёў намеснік начальніка галоўнай вайсковай палітычнай управы Мінабароны, камандзір спецыяльнага прызначэння «Ахмат» Апці Алаўдзінаў, піша «Агенцтва. Навіны».

Алаўдзінаў адказваў на пытанне Z-блогера Максіма Калашнікава аб тым, ці даходзілі да яго чуткі пра “непрыстойныя паводзіны” байцоў “Ахмата” ў тыле.

“Я знаходжуся зараз на курскім кірунку. Я адразу ж схадзіў да начальніка УМУС Курскай вобласці і задаў яму ў лоб пытанне: „Якія ў вас праблемы з „Ахматам“, як толькі я сюды зайшоў?“ Ён усміхнуўся і сказаў: „У нас на тэрыторыі ўчынена 187 злачынстваў вайскоўцамі. Гэта забойствы, згвалтаванні, іншае, іншае. Ніводнага з гэтых злачынстваў не ўчынілі байцы падраздзялення "Ахмат", — сказаў Алаўдзінаў.

Камандзір "Ахмата" не ўдакладніў, за які перыяд былі ўчыненыя гэтыя злачынствы. Алаўдзінаў абвяшчаў аб прыбыцці "Ахмата" ў рэгіён 8 жніўня.