ЕСПЧ запатрабаваў ад РФ выплаціць «Радыё Свабода» €956 тысячаў
- 22.10.2024, 20:49
За прызнанне «іншаагентам».
Еўрапейскі суд у правах чалавека вынес пастанову паводле справы 19659/21 «ТАА "Радыё Свабодная Еўропа / Радыё Свабода" і Андрэй Шарый супраць Расейскай Федэрацыі». Справа тычылася абвяшчэньня расейскімі ўладамі «Радыё Свабода» так званым «замежным агентам». Як гаворыцца ў паведамленні ЕСПЧ, якое паступіла ў распараджэнне «Радыё Свабода», суд аднагалосна пастанавіў, што расейскімі ўладамі былі парушаныя артыкулы 10 і 11 Еўрапейскай канвенцыі аб правах чалавека, якія тычацца свабоды слова і свабоды аб'яднанняў. Згодна з пастановай, яны павінны выплаціць «Радыё Свабода» €955 440 матэрыяльных стратаў і €850 за нематэрыяльныя выдаткі.
Поўны тэкст пастановы суду апублікаваны на ягоным сайце.
Суд пастанавіў, што цяперашняе расейскае заканадаўства аб «іншаагентах» з'яўляецца стыгматызальным, якое ўводзіць у зман, выкарыстоўваецца вельмі шырока і непрадказальна і ў цэлым накіраваным на пакаранне, а не на павышэнне празрыстасці працы НКА. Асобна ўказана на абавязак маркіраваць усе публікацыі, зробленыя так званымі «замежнымі агентамі». Гэтае і іншыя абмежаванні, як гаворыцца ў пастанове ЕСПЧ, падрываюць сам фундамент дэмакратычнага грамадства.
ТАА «РСЕ/РС», якое прадстаўляла інтарэсы амерыканскай медыякарпарацыі «Радыё Свабодная Еўропа/Радыё Свабода» ў Маскве, і ягоны генеральны дырэктар Андрэй Шарый звярнуліся з пазовам у ЕСПЧ у траўні 2021 года. Пазоў тычыўся шматмільённых штрафаў, накладзеных на «Радыё Свабода», тэлеканал «Сапраўды Час» і іншыя праекты медыякарпарацыі за парушэнне загаду Раскамнагляду аб маркіроўцы журналісцкіх матэрыялаў паводле заканадаўства аб СМІ – «замежных агентах». Выкарыстанне гэтага заканадаўства, указвалі пазоўнікі, парушае артыкулы Еўрапейскай канвенцыі ў правах чалавека.
Міністэрства юстыцыі Расеі ўнесла расейскамоўныя праекты РСЕ/РС у спіс «замежных агентаў» у 2017 годзе. Медыякарпарацыя мяркуе, што такая пастанова несправядлівая. У студзені – траўні 2021 года, да моманту падачы пазову ў ЕСПЧ, Раскамнагляд склаў і накіраваў у суд 520 пратаколаў аб парушэнні РСЕ/РС правілаў маркіроўкі журналісцкіх публікацый, уведзеных згодна з прынятымі ў 2020 годзе папраўкамі да заканадаўства аб «замежных агентах». Медыякарпарацыя сістэматычна абскарджвала накладанне штрафаў, абгрунтоўваючы сваю пазіцыю шматлікімі парушэннямі ўладамі Расеі законаў аб дзейнасці СМІ, аднак суды нязменна адхілялі апеляцыі ТАА «РСЕ/РС» і яе гендырэктара.
Гэта першая справа ў практыцы ЕСПЧ у пытанні аб ужыванні заканадаўства РФ аб «замежных агентах» да рэдакцый СМІ і іх кіраўнікам. Беручы да ўвагі важнасць пытання, суд разглядаў скаргі журналістаў у прыярытэтным парадку, таму пастанова, як указваюць эксперты, вынесеная даволі хутка.