У Менску «рада маральнасці» скасавала вядомы спектакль

• 22.10.2024, 11:49

Яго хацелі падарыць жанчынам у гонар Дня маці.

У Менску з падачы Грамадскага савету маральнасці скасавалі спектакль “Каханкі майго мужа”, паведаміў сустаршыня рады кіраўнік Беларускай праваслаўнай царквы Маскоўскага патрыярхату мітрапаліт Веніямін на прэс-канферэнцыі 21 кастрычніка, паведамляе “Позiрк”.

Пастаноўку, паводле слоў мітрапаліта, "прапанавалі падарыць жанчынам у гонар Дня маці 14 кастрычніка", спектакль "у выніку быў скасаваны".

“Гэта - адна з першых такіх спраў з працы Савета маральнасці. Добра, ёсць добрае ўзаемадзеянне паміж міністэрствамі і ведамствамі, якія могуць так ці інакш уплываць на развіццё працэсаў у грамадстве”, - заявіў Веніямін.

На яго думку, "неабходна ўказваць на спакусы, якія здольныя пашкодзіць неакрэплыя душы падрослага пакалення, а, калі трэба, і асцерагаць ад іх".