Вялікабрытанія выдасць Украіне $3 млрд вайсковага крэдыту

• 22.10.2024, 10:06

Яго будуць выплачваць сродкамі РФ.

Падчас візіту да ўкраінскіх вайскоўцаў міністр фінансаў Вялікабрытаніі Рэйчэл Рыўз разам з міністрам абароны Джонам Гілі абвясцілі аб выдачы Украіне £2,26 млрд (прыкладна $3 млрд) вайсковага крэдыту. Пра гэта гаворыцца ў паведамленні, апублікаваным на сайце брытанскага ўрада 22 кастрычніка.

У рэлізе пазначана, што гэта частка буйнога крэдыту на $50 млрд у рамках праграмы G7, якая будзе выплачвацца на сродкі прыбытку ад замарожаных на Захадзе расейскіх актываў.

«Крэдыт Вялікабрытаніі сумай £2,26 млрд. прызначаны для бюджэтнай падтрымкі вайсковых выдаткаў Украіны, што дазволіць украінцам інвеставаць у асноўнае абсталяванне для падтрымкі іх намаганняў супраць Расеі, такое як супрацьпаветраная абарона, артылерыя і больш шырокае тэхнічнае забеспячэнне", – гаворыцца ў паведамленні.

Гэты крэдыт з'яўляецца дадаткам да ваеннай дапамогі на 3 млрд на год, якую абавязалася даць Украіне Вялікабрытанія, удакладнілі ва ўрадзе каралеўства.

Аўтары паведамлення нагадалі, што аб праграме, якая прадугледжвае выдзяленне краінамі «Вялікай сямёркі» крэдыту на $50 млрд для Украіны, абвясцілі ў чэрвені 2024 года.

«Сёння Вялікабрытанія абвясціла аб сваім укладзе ў гэтую праграму і ў найбліжэйшыя тыдні ўвядзе нацыянальнае заканадаўства, якое дазволіць як мага хутчэй перавесці новыя сродкі Украіне. Гэта пазыка з'яўляецца дадатковым да £12,8 млрд, ужо выдзеленым на вайсковую, эканамічную і гуманітарную падтрымку Украіны. Фінансаванне паступае адначасова з увядзеннем Вялікабрытаніяй і міжнароднымі партнёрамі найбуйнейшага і самага жосткага пакета санкцый, якога ніколі яшчэ не накладалі на вялікую эканоміку. Без гэтага Расея атрымала б дадатковыя $400 млрд для сваёй ваеннай машыны - чаго хапіла б для фінансавання незаконнага ўварвання на працягу наступных чатырох гадоў», - дадалі ў рэлізе.