Дроны масава атакавалі Маскву і восем рэгіёнаў РФ
- 20.10.2024, 8:16
Былі выбухі і пажары.
Адразу ў некалькіх абласцях Расеі ў ноч на 20 кастрычніка вялася работа сіл і сродкаў супрацьпаветранай абароны праз фіксацыю беспілотнікаў, раздаліся выбухі і ўзніклі пажары. Заяўляецца аб «адбіванні» паветранага нападу сама меней у 8 рэгіёнах.
Пра гэта паведамляе РБК-Украіна са спасылкай на расейскія медыя, заявы мясцовых губернатараў і мэра Масквы.
Адзначаецца, што праз «масаваную» атаку дронаў СПА працавала ў Ліпецкай, Тульскай, Разанскай, Арлоўскай, Іванаўскай, Курскай, Калужскай і Маскоўскай абласцях.
Маскоўская вобласць
Блізу 02:46 паводле мясцовага часу мэр сталіцы краіны агрэсара РФ Сяргей Сабянін у сваім Telegram заявіў, што ў выніку працы СПА ў Раменскай гарадской акрузе нібыта была «адбітая атака беспілотніка, які ляцеў на Маскву».
«На месцы падзення абломкаў, паводле папярэдніх звестак, разбурэнняў і пацярпелых няма. Спецыялісты экстранных службаў працуюць на месцы здарэння», - гаворыцца ў ягонай заяве.
Ліпецкая вобласць
Губернатар гэтай вобласці Ігар Артамонаў у сваім Telegram-канале распавёў пра нібыта «падаўленне» БПЛА ў небе над Ліпецкам і Ліпецкай муніцыпальнай акругай.
«На месцы падзення абломкаў працуюць спецслужбы», - інфармаваў расейскі чыноўнік і прасіў таксама не публікаваць у інтэрнэце «фота і відэа аб наступствах нападаў беспілотнікаў або іх пралётаў».
А 02.22 ён распавёў, што «абломкі БПЛА ўпалі на праезную частку ў раёне Сырскага Рудніка».
А ўжо амаль а трэцяй ночы губернатар удакладніў, што «ахвяраў і пацярпелых няма».
«Узгаранні, якія ўзніклі на зямлі пасля падзення БПЛА, былі аператыўна патушаныя. На месцах выяўлення фрагментаў працягваюць працаваць спецслужбы, іх задача - абясшкоджванне ўсіх абломкаў», - гаворыцца ў паведамленні расейскага чыноўніка ў сетцы.
Разам з тым, у інтэрнэце былі паказаны кадры з выбухамі і пажарам у Ліпецкай вобласці, як сцвярджаецца, у выніку атакі беспілотнікаў.
Арлоўская вобласць
У гэтым рэгіёне скардзіліся на дронавую атаку ўвечары ў суботу, і заяўлялі аб нібы збіванні сродкамі СПА 7 беспілотнікаў.
Як распавёў губернатар Арлоўскай вобласці Андрэй Клічкоў, гэта адбылося «на тэрыторыі рэгіёну».
З яго слоў, пацярпелых і пашкоджанняў нібыта не было, і «працуюць аператыўныя службы».
Аднак пазней, ужо ўначы, расейскі чыноўнік заявіў аб знішчэнні СПА яшчэ чатырох беспілотнікаў у вобласці.
Курская вобласць
Аб дронавым нападзе ў Курскай вобласці таксама паведамлялася ў сетцы яшчэ з вечара суботы, 19 кастрычніка. Мясцовы губернатар Аляксей Смірноў пісаў у сваім Telegram аб працы СПА ў рэгіёне, і аб збіцці 8 дронаў самалётнага тыпу яшчэ а палове на дзясятую вечара.
Аднак у сетцы з'явіліся кадры, на якіх можна пачуць выбухі гэтай ноччу, у выніку працы СПА праз атаку беспілотнікаў у Курскай вобласці, прынамсі, у Курску, і паведамлялася аб гучных выбухах паблізу горада Жалезнагорска.