У Гродне на аўкцыёне прадаюць кватэры разам з жыхарамі

• 19.10.2024, 20:17

Патэнцыйныя пакупнікі сутыкнуцца з праблемамі.

Гарадзенскі цэнтр нерухомасці выставіў на таргі тры кватэры ў розных раёнах горада. Самы даступны варыянт - двухпакаёвая кватэра плошчай 43 квадратныя метры на вуліцы Гагарына. Яна знаходзіцца на другім паверсе чатырохпавярховага дома. Стартавая цана - 59 тысяч рублёў, піша newgrodno.by.

Крыху даражэй ацанілі аднапакаёвую кватэру плошчай амаль 35 квадратных метраў у доме № 25 па вуліцы Паповіча. Пачатковы кошт складае 62,2 тысячы рублёў.

Самы дарагі лот - двухпакаёвая кватэра плошчай 40 квадратных метраў у доме №39 па вуліцы Мендзялеева. Таргі за гэтую кватэру пачнуцца з 65 тысяч рублёў.

Галоўная асаблівасць аўкцыёну заключаецца ў тым, што ўсе тры кватэры прадаюцца разам з жыльцамі. У Гарадзенскім цэнтры нерухомасці папярэджваюць патэнцыйных пакупнікоў:

«У кватэрах зарэгістраваны і пражываюць даўжнікі. Пры адмове былога ўласніка вызваліць прададзенае з публічных таргоў жылое памяшканне ён падлягае высяленню ў судовым парадку. Пераможца аўкцыёну самастойна ажыццяўляе дзеянні, звязаныя з афармленнем пераходу права ўласнасці на нерухомую маёмасць у адпаведнасці з заканадаўствам».

Гэта азначае, што новым уладальнікам давядзецца сутыкнуцца з дадатковымі юрыдычнымі працэдурамі пасля куплі жылля. Ім трэба або дамаўляцца з ранейшымі гаспадарамі аб добраахвотным высяленні, або развязваць гэтае пытанне праз суд.