У Бранскай вобласці дроны падбілі завод «Крэмні Эл»

• 19.10.2024, 10:18

Гэта адзін з найбуйнейшых вытворцаў мікраэлектронікі ў Расеі.

У ноч на 19 кастрычніка дроны атакавалі важны расейскі завод «Крэмні Эл» у Бранскай вобласці. Гэта ўжо чацвёртая атака БПЛА на прадпрыемства.

Пра гэта паведамляе Telegram-канал ASTRA.

«У выніку дэтанацыі выбухной прылады збітага беспілотніка ў паддашкавай частцы нежылога будынка адбылося загаранне», – піша Telegram-канал.

Як удакладняецца, атаку на завод мясцовыя ўлады не пацвярджалі, але пра гэта паведамляюць мясцовыя жыхары. Мясцовая ўлада паведаміла толькі, што «пры адбіцці атакі адзін з беспілотнікаў рэзнуўся ў нежылы будынак». Паводле іх звестак, нібыта пацярпелых няма.

Як пішуць расейскія СМІ са спасылкай на Мінабароны РФ, сродкі СПА цягам ночы нібыта знішчылі і перахапілі 16 украінскіх БПЛА над тэрыторыяй Бранскай, Растоўскай і Белгарадскай абласцей. Сярод іншага, нібыта толькі з раніцы 19 кастрычніка над Бранскай вобласцю збілі чатыры БПЛА.

«Пацярпелых у Бранскай вобласці, над якой уначы збілі 13 БПЛА, у т.л. тры рэактыўныя, няма, працуюць аператыўныя службы», – зрабілі справаздачу мясцовыя ўлады.

Завод «Крэмні Эл»: чаму ён важны

Прадпрыемства «Крэмні Эл» – адзін з найбуйнейшых вытворцаў мікраэлектронікі ў Расеі. Сярод іншага, на прадпрыемстве вырабляюць камплектавальнікі для ваеннай тэхнікі. Завод размешчаны больш за 100 км ад мяжы. Завод удзельнічае ў распрацоўцы новых РЛС, якія, сярод іншага, прызначаныя для СПА, самалётаў, караблёў.

Не першая атака

Адзначым, што «Крэмні Эл» дроны атакуюць не ўпершыню. Напрыклад, у жніўні летась на заводзе «Крэмні Эл» успыхнуў маштабны пажар пасля нападу беспілотнікаў. Акрамя таго, дроны атакавалі завод 7 верасня 2023 г. і ў чэрвені 2024 года.