Ва Уроцлаве праходзiць Фестываль незалежнай беларускай культуры

• 18.10.2024, 18:15

Фотафакт.

Фестываль незалежнай беларускай культуры пачаўся ва Уроцлаве 16 кастрычніка. Імпрэза праходзiць ужо ў 12-ты раз.

У праграме фестывалю 2024 года — 19 разнастайных мерапрыемстваў ад спектакляў і дыскусій да кніжнага кірмаша і канцэртаў.

Слоган фестывалю 2024 года, як паведамiлi сайту Сharter97.org арганiзатары — «Разам — далей». Гэта заклік да сумеснага разважання пра будучыню, запрашэнне не спыняцца на дасягнутым і ісці далей разам, падтрымліваючы адзін аднаго. Каманда фестывалю імкнецца натхняць людзей на сумесныя дзеянні і стварэнне разам новай рэальнасці.

У першы дзень фестывалю — 16 кастрычніка прайшла экскурсія па выставе ў Музеі Пана Тадэвуша і спектакль «Неверагоднае славянства».

У другі дзень — 17 кастрычніка— адбылася адкрытая дыскусія «Пераадольванне стэрэатыпаў. Беларусы, палякі і літоўцы» паказалi спектакль «З@.КЛЯЦЦЕ».

18 кастрычніка плануецца паказ фільма Юрыя Хашчавацкага «Выпадковы прэзідэнт» і дыскусія.

19 кастрычніка адкрыецца выстава графікі Юліі Грыцук «Не знікай». А таксама будзе працаваць творчая прастора для дзяцей «Ствараем разам».

У апошні дзень фестывалю — 20 кастрычніка — адбудзецца літаратурная сустрэча «Што далей у літаратуры?» з удзелам Святланы Курс / Евы Вежнавец, Уладзіміра Някляева і Насты Кудасавай і адкрыецца фотавыстава «Постаць».

На некаторыя мерапрыемствы патрэбны квіткі або рэгістрацыя; большая частка падзей бясплатная і даступная для ўсіх жадаючых.

Больш поўная праграма фестывалю тут.

Кантакты для сувязі: суарганізатарка фестывалю Наталля Хацько

+48 571 936 220