Украіна прапанавала новую схему паставак газу ў ЕЗ

• 17.10.2024, 12:10

Падрабязнасці.

Украіна прапанавала Славакіі і Азербайджану новую схему паставак газу праз сваю тэрыторыю ў Еўрапейскі Звяз. Тэма закранаецца падчас некаторых двухбаковых сустрэч.

Пра гэта гаворыцца ў матэрыяле РБК-Украіна.

Цяпер, паводле інфармацыі выдання, абмяркоўваецца варыянт захоўвання газу ва ўкраінскіх падземных сховішчах з наступнай пастаўкай у Славакію ці іншыя краіны. У выніку такія пастаўкі будуць лічыцца не транзітам, а рээкспартам газу.

Прапанова альтэрнатывы ў тым, што ўладальнік газу для пачатку проста запампоўвае яго на захоўванне ў ПСГ, а потым можа выкарыстоўваць на ўласнае меркаванне. Такія прапановы зроблены і Азербайджану, і Славакіі некалькі месяцаў таму.

Напрыклад, калі газ будзе запампоўваць Азербайджан, то потым, у залежнасці ад кан'юнктуры рынку і патрэб краін Еўразвязу ў газе, ён зможа прадаваць яго на біржы або паводле кантрактаў.

Калі на прапанову пагодзіцца Славакія, то яна зможа купляць газ на мяжы Украіны і РФ, або на месцы яго ўваходу з Азербайджана ў Расею, запампоўваць ва ўкраінскія ПСГ і потым выкарыстоўваць па меры неабходнасці сама ці прадаваць трэцім краінам.

Але пакуль наконт гэтай прапановы праходзілі толькі кансультацыі бакоў. “Перамовамі гэта назваць нельга. Тэма закранаецца ў межах некаторых двухбаковых сустрэч, але прадметна і дэталёва нічога не абмяркоўваецца”, - сказаў суразмоўца выдання, знаёмы з працэсам абмеркавання “транзітнай” тэмы.

Нагадаем, паводле інфармацыі Bloomberg, у ЕЗ абмяркоўваюць два варыянты захавання транзіту газу праз Украіну з 2025 года пасля заканчэння кантракта з "Газпрамам". У схемах таксама прапануецца задзейнічаць Азербайджан. Аднак угода далёкая ад укладання.