Навукоўцы расказалі аб карысці медытацыі

• 15.10.2024, 14:08

Гэтая практыка можа замяніць антыдэпрэсанты.

Даследчыкі з Нацыянальнага інстытута псіхічнага здароўя ЗША прыйшлі да высновы, што эфектыўнасць медытацыі пры розных трывожных разладах супастаўная з прыёмам антыдэпрэсантаў, піша «Нож».

У аналіз увайшлі 276 пацыентаў з клінічна ўсталяваным дыягназам агарафобіі, панічнага разладуу, генералізаванага або сацыяльнага трывожнага разладу.

Палове з іх штотыдзень праводзілі трэнінгі па тэорыі і практыцы некалькіх відаў медытацыі ўсвядомленасці, астатнім прызначылі эсцыталопрам дозай 10-20 міліграм на дзень.

Ступень трывожнасці, дэпрэсіі і якасць жыцця ацэньвалі праз апытальнікі пацыентаў і лекараў. Першасныя вынікі рэгістравалі праз восем тыдняў, у суме назіранне працягвалася 24 тыдні.

У абедзвюх групах заўважылі значнае памяншэнне сімптомаў трывожнасці. Пры гэтым істотных адрозненняў у эфектыўнасці тэрапіі паміж імі зарэгістравана не было.

У той жа час пабочныя эфекты былі зафіксаваныя ў 78,6 працэнта ўдзельнікаў, якія прымалі эсцыталапрам, супраць 15,4 працэнта сярод тых, хто практыкаваў медытацыю ўсвядомленасці.