Названы самы зялёны горад Беларусі

• 12.10.2024, 12:37

І гэта не Менск.

У беларускіх гарадах становіцца больш зеляніны, сцвярджае першы намеснік міністра прыродных рэсурсаў і аховы навакольнага асяроддзя Аляксандр Корбут. На прэс-канферэнцыі ён прывёў рэйтынг узроўню «азелянення» абласных цэнтраў — на першым месцы Віцебск, а Менск у канцы, але вышэй за Гародню.

Са слоў Корбута, за апошнія тры гады ўзровень азелянення населеных пунктаў у Беларусі расце. Рэйтынг у гэтым паказчыку такі:

Віцебск - 49,1%.

Берасце - 45,7%.

Магілёў - 44,3%.

Гомель - 42,5%.

Менск - 42,1%.

Гародня - 41,8%.

Калі разглядаць раёны Менска, то ўзровень азелянення Партызанскага раёна складае больш за 69%, а Кастрычніцкага - усяго 24,2%.

Працягваецца і актыўнае азеляненне ля трас. Так, уздоўж рэспубліканскіх аўтамабільных дарог за гэты год высадзілі амаль 14 тысяч дрэў і 35 тысяч кустоў, а ўздоўж мясцовых - блізу чатырох тысяч дрэў і дзвюх тысяч кустоў, паведамілі ў Мінпрыроды.