Еўразвяз скараціў штат у менскім прадстаўніцтве
- 1.10.2024, 17:21
Частку супрацоўнікаў перавялі ў Брусэль.
Частку супрацоўнікаў прадстаўніцтва Еўразвязу ў Менску перавялі ў Брусэль. Гэтую інфармацыю пацвердзіў 1 кастрычніка выданню «Позірк» афіцыйны прадстаўнік Еўрапейскай службы замежных дзеянняў Петэр Стана.
З яго слоў, гэты захад абумоўлены сённяшняй сітуацыяй у Беларусі і ўзроўнем двухбаковых стасункаў Менска і Еўразвяза.
Пры гэтым, зазначыў Петэр Стана, адкліканыя супрацоўнікі прадоўжаць у Брусэлі «сваю важную працу, звязаную з Беларуссю».
Стана паведаміў, што Еўразвяз «адаптуе сваю дыпламатычную прысутнасць у трэціх краінах у адпаведнасці з неабходнасцю і вонкавымі абставінамі», аднак «пытанні арганізацыі працы Прадстаўніцтва ЕЗ з'яўляюцца ўнутранай справай Еўрапейскай службы замежных дзеянняў і, як правіла, публічна не абмяркоўваюцца».
«Палітыка ЕЗ у дачыненні да Беларусі застаецца нязменнай. Дарэчы, Еўразвяз па-ранейшаму адданы падтрымцы народа Беларусі», - падкрэсліў прадстаўнік Еўрапейскай службы замежных дзеянняў.