ЗША выдалі амаль дзевяць мільярдаў даляраў на вытворчасць бомб і ракет

• 1.10.2024, 15:48

У тым ліку і з ядзернымі боегалоўкамі.

Міністэрства абароны ЗША ўклала два буйныя кантракты на вытворчасць узбраенняў для Украіны, Балгарыі, Японіі і іншых краін. Сума кантрактаў складае амаль 9 млрд даляраў. Аб гэтым паведамляецца на сайце Міністэрства абароны ЗША.

Першы кантракт на 6,9 млрд даляраў быў укладзены з кампаніяй Boeing на вытворчасць малакаліберных бомб. Гэтыя бомбы будуць адпраўленыя, у тым ліку, і ва Украіну. Тэрмін выканання кантракта - да 31 снежня 2035 года.

Другі кантракт на 2,1 млрд даляраў быў укладзены з карпарацыяй Lockheed Martin на вытворчасць міжкантынентальных балістычных ракет Trident II D5 з новымі ядзернымі боегалоўкамі. Гэтыя ракеты прызначаныя для запуску з падводных лодак.