FT: Байдэн можа прыняць важную пастанову аб сяброўстве Украіны ў NАТО

• 1.10.2024, 14:08

Да канца свайго прэзідэнцтва.

Прэзідэнт ЗША Джо Байдэн можа пагадзіцца падвысіць статус заяўкі Украіны на сяброўства ў NАТО да таго, як сыдзе з пасады ў студзені. Пра гэта паведамляе Financial Times у аўторак, 1 кастрычніка, са спасылкай на заходняга чыноўніка, інфармаванага аб перамовах прэзідэнта Украіны Уладзіміра Зяленскага.

FT піша, што пакуль мала хто з 32 краін NАТО мяркуе, быццам сяброўства Украіны ў Альянсе магчымае без поўнага спынення агню і дакладнай лініі на карце, якая б вызначала, на якую частку ўкраінскай тэрыторыі распаўсюджваецца палажэнне аб узаемадапамозе.

У той жа час, як адзначаецца ў матэрыяле, некаторыя прапануюць заходненямецкую мадэль сяброўства ў NАТО - уступленне часткі краіны.

"Заходненямецкая мадэль набірае абароты, асабліва ў Белым доме, які быў найбольш скептычна настроены наконт сяброўства ў NАТО ", – адзначыў кіраўнік вашынгтонскага офіса Еўрапейскай рады ў міжнародных дачыненнях Джэрэмі Шапіра.

Аднак нават гэта запатрабавала б ад ЗША разгортвання значных сіл, на што ні рэспубліканская, ні дэмакратычная адміністрацыя не пагодзіцца, гаворыцца ў матэрыяле.

У той жа час, паводле слоў украінскага чыноўніка, нават атрыманне Украінай запрашэння ў NАТО нічога не будзе азначаць.

"Гэта палітычная пастанова", - адзначыў ён.

30 верасня былы генеральны сакратар NАТО Енс Столтэнбэрг заявіў, што толькі супольнікі з Альянсу будуць вызначаць, ці магчыма запрасіць Украіну ў блок уключаючы часова акупаваныя тэрыторыі.