Лукашэнка спалохаўся атрымання ордэра Гаагі за выкраданні ўкраінскіх дзяцей

• 30.09.2023, 16:02

Іх жадаюць паказаць дыпламатам.

Улады Беларусі надумалі арганізаваць тур прадстаўнікам дыпламатычнага корпуса па месцах «пражывання, навучання і аздараўлення» ўкраінскіх дзяцей, якія былі вывезеныя з акупаваных Расеяй тэрыторый.

Пра гэта паведамляе прэс-служба Міністэрства замежных спраў Украіны.

«Указаны захад мае на мэце легалізацыю незаконнага перамяшчэння ўкраінскіх дзяцей з часова акупаваных тэрыторый Украіны. Згодна з нормамі міжнароднага права, прымусовая дэпартацыя дзяцей можа кваліфікавацца як ваеннае злачынства.

Каб пазбегнуць адказнасці, службовыя асобы ў Беларусі спрабуюць прыкрыцца міжнароднымі прадстаўнікамі. Заклікаем замежныя дзяржавы, дыпламатычныя прадстаўніцтвы якіх атрымалі адпаведныя запрашэнні ў Менску, устрымацца ад удзелу ў прапагандысцкай паездцы беларускага рэжыму.

Як на ўзроўні нацыянальнага расследавання, так і ў рамках расследавання Міжнароднага крымінальнага суда, прадоўжым працу па прыцягненні да адказнасці ўсіх асоб, якія ўчынялі злачынствы супраць украінскіх дзяцей», - гаворыцца ў паведамленні.

Нагадаем, раней ордэр за вываз украінскіх дзяцей быў выдадзены на прэзідэнта Расеі Уладзіміра Пуціна. Калі ён прыляціць у кожную з краін, што ратыфікавалі Рымскі статут, яго могуць затрымаць. Такіх краін - 123.