Святлана Ціханоўская сустрэлася з кіраўнікамі МЗС Аўстрыі, Балгарыі і Грэцыі

• 8.10.2020, 21:10

Яна запатрабавала ўключыць Лукашэнку ў санкцыйны спіс, а таксама ўзняла пытанне пра блакаванне інтэрнэту аператарам А1.

Святлана Ціханоўскі сустрэлася з міністрам замежных спраў Аўстрыі Аляксандрам Шаленбергам.

Сустрэча доўжылася 30 хвілін. Святлана падзякавала міністру за тое, што Аўстрыя падтрымала санкцыйны спіс беларускіх чыноўнікаў, якія працуюць на рэжым. І адзначыла, што ў гэтым спісе павінен быць і Лукашэнка, і іншыя людзі, якія займаліся фальсіфікацыямі на выбарах і разгонамі мірных мітынгаў.

Святлана і Аляксандр абмеркавалі, ці можа Аўстрыя быць пляцоўкай для перамоў аб новых выбарах. Таксама пагаварылі пра сітуацыю з аператарам А1 (ён падае паслугі ў Беларусі, але ўваходзіць у склад міжнароднай групы A1 Telekom Austria Group) і адключэннем інтэрнэту падчас вулічных пратэстаў.

У канцы сустрэчы Святлана і Аляксандр абмеркавалі дзеянні ў падтрымку беларускага народа, якія могуць быць выкананы на ўзроўні ЕЗ.

Акрамя гэтага, Святлана Ціханоўская сустрэлася з міністрамі замежных спраў Балгарыі і Грэцыі.

З міністрам замежных спраў Балгарыі Кацярынай Захарыевай Святлана абмеркавала магчымую праграму рэабілітацыі для пацярпелых падчас разгонаў, а таксама візавую падтрымку для беларусаў. Святлана падзякавала Балгарыю за падтрымку персанальных санкцый супраць прыхільнікаў рэжыму.

Кіраўнік МЗС Грэцыі Нікас Дэндзіяс на сустрэчы са Святланай адзначыў, што для Грэцыі вельмі важна падтрымліваць правы чалавека і востра стаіць пытанне вызвалення палітвязняў у Беларусі. Святлана заявіла, што персанальныя санкцыі варта пашырыць і на ўзроўні Грэцыі, паколькі яны могуць быць накладзеныя, у тым ліку, на супрацоўнікаў міліцыі і спецназа, якія ўдзельнічалі ў разгонах мірных шэсцяў беларусаў.