Трамп назваў «божай ласкай» сваё заражэнне каранавірусам

• 8.10.2020, 11:41

Прэзідэнт ЗША заявіў, што ключом да ягонага выздараўлення стаў экспэрыментальны лекавы кактэйль.

Амерыканскі прэзідэнт Дональд Трамп вярнуўся ў Авальны офіс пасля наведвання лякарні. Прэзідэнт ЗША заявіў, што яго заражэнне каранавірусам - гэта дабраславенне яму ад Бога.

У сваім відэазвароце Трамп запэўнівае, што ключом да ягонага выздараўлення стаў эксперыментальны лекавы кактэйль. Ён сам надумаў лячыцца прэпаратам, які рэдка выкарыстоўваўся па-за клінічнымі выпрабаваннямі.

- Я адчуваю сябе выдатна. Я адчуваю сябе ідэальна, - кажа Трамп на відэа. - Я думаю, што гэта было дабраславенне ад Бога, што я злавіў вірус. Гэта было замаскаваным блаславеннем. Я падхапіў яго, я чуў пра гэты прэпарат, я сказаў, дайце мне яго прыняць. Гэта была мая прапанова.

Пасля заяў Трампа акцыі фармацэўтычнай кампаніі, якая зрабіла прэпарат, выраслі ў кошце амаль на 4%. Сама кампанія падала заяўку ва Управу санітарнага нагляду за якасцю харчовых прадуктаў і медыкаментаў ЗША для атрымання дазволу на яго масавае выкарыстанне. Кіраўнік гэтай кампаніі з'яўляецца чальцом прэзідэнцкага гольф-клуба. Трамп валодаў акцыямі гэтай кампаніі ў 2017 годзе.