Прававы інспектар прафзвязу РЭП прабег марафон на знак салідарнасці з палітвязнямі

• 7.10.2020, 18:25

Уладзімір Малей зрабіў 10-кіламетровы забег.

Прававы інспектар прафзвязу РЭП Берасцейскай вобласці Уладзімір Малей прабег 10 кіламетраў на знак салідарнасці з палітвязнямі, піша сайт praca-by.info.

У Маларыце прайшоў традыцыйны, ужо 37-ы па ліку, Маларыцкі міжнародны марафон. Прававы інспектар прафзвязу РЭП Берасцейскай вобласці Уладзімір Малей зрабіў 10-кіламетровы забег на знак салідарнасці з арыштаваным відэаблогерам з Берасця Сяргеем Пятрухіным.

- Звычайна на марафон прыязджаюць пенсіянеры з Украіны, аднак праз каранавірус сёлета народу было мала. А я ўжо які год бегаю 10 кіламетраў. Праўда, падчас трэніроўкі трохі траўмаваў нагу, тыдні два аднаўляўся, вагаўся: бегчы ці не бегчы? І вызначыў: як так, Маларыта і без Малея? Наважыў пабегчы са сцягам РЭП, - смяецца Уладзімір Малей.

- Акрамя таго, на знак салідарнасці з палітвязнямі пабег у цішотцы з партрэтам Сяргея Пятрухіна. Бліжэй да фіналу траўма нагі дала пра сябе ведаць, тэмп скінуў. Але вынікам задаволены: гадзіна і дзве хвіліны, нядрэнны вынік для маіх 69-ці гадоў, - адзначыў прававы інспектар.