Рэктар Гомельскага медычнага ўніверсітэта: Досвед працы ў «чырвонай зоне» павінны атрымаць усе студэнты-медыкі

• 7.10.2020, 10:10

Студэнтаў адпраўляюць працаваць з хворымі на COVID-19.

Студэнтам медыцынскіх ВНУ Беларусі ва ўмовах другой хвалі распаўсюджвання каранавіруса будзе максімальна захавана вочная форма навучання, заявіла намесніца міністра аховы здароўя Алена Богдан, паведаміла прэс-служба Міністэрства аховы здароўя.

Прадстаўнік ведамства ў аўторак сустрэлася з маладымі людзьмі, якія цяпер праходзяць вучобу ў Гомельскім дзяржаўным медыцынскім універсітэце, і адказала на іх пытанні, у тым ліку аб магчымай змене адукацыйнага працэсу ў сувязі з павелічэннем у краіне выпадкаў заражэння COVID-19.

Як паведамілі ў прэс-службе, Богдан запэўніла студэнтаў-медыкаў, што для іх, нягледзячы на другую хвалю каранавіруса, будзе максімальна захавана вочная форма навучання атрымання ведаў.

У сваю чаргу рэктар ВНУ Ігар Стома адзначыў, што для будучых лекараў будзе карысны досвед валанцёрства падчас пандэміі: досвед працы ў «чырвонай зоне» павінны атрымаць усе студэнты.