«Рэпарцёры без межаў» раскрытыкавалі рэжым Лукашэнкі

• 6.10.2020, 21:45

Узурпатар выкарыстоўвае ўсе магчымыя сродкі для прадухілення з’яўлення інфармацыі пра падзеі ў Беларусі.

Міжнародная няўрадавая арганізацыя «Рэпарцёры без межаў» раскрытыкавала спробы беларускага рэжыму перашкодзіць працы незалежных СМІ ў краіне і за мяжой і зрабіць немагчымым асвятленне пратэстаў супраць рэжыму Аляксандра Лукашэнкі, паведамляе DW.

«Лукашэнка выкарыстоўвае ўсе магчымыя сродкі для прадухілення асвятлення аб тым, што адбываецца ў Беларусі, асабліва пра гвалт, што ўжываюць сілавыя структуры ў дачыненні да мірных дэманстрантаў. Але праца шэрагу мужных калег на месцах дэманструе, што інфармацыя не можа быць падаўленая», - прыводзяцца словы кіраўніка «Рэпарцёраў без межаў» у Нямеччыне Крысціяна Міра ў паведамленні арганізацыі, апублікаваным у аўторак, 6 кастрычніка.

У якасці прыкладаў накіраваных супраць журналістаў дзеянняў беларускіх уладаў «Рэпарцёры без межаў» прыводзяць ануляванне акрэдытацыі ўсіх замежных карэспандэнтаў у пачатку кастрычніка, пазбаўленне статусу СМІ папулярнага навінавага партала tut.by, ціск на інтэрнэт-выданне «Наша ніва», арышты журналістаў. Так, паводле звестак Беларускай асацыяцыі журналістаў (БАЖ), толькі ў верасні было арыштавана не менш за 60 работнікаў СМІ.

Праваабарончая арганізацыя адзначае, што ў рэйтынгу свабоды прэсы Беларусь займае 153-е месца з 180.