Арменія назвала ўмову для саступак па Карабаху

• 6.10.2020, 21:28

Умовы назваў прэм'ер-міністр Арменіі Нікол Пашынян.

Арменія гатовая на саступкі па Нагорным Карабаху, калі на аналагічныя меры пойдзе Азербайджан. Пра гэта заявіў прэм'ер-міністр Арменіі Нікол Пашынян агенцтву AFP.

«Канфлікты павінны вырашацца на аснове ўзаемных саступак. Нагорны Карабах да іх гатовы, Арменія пойдзе на люстраныя саступкі, калі да іх будзе гатовы Азербайджан», - сказаў кіраўнік армянскага ўрада.

Пашынян зноў адзначыў, што баявыя сутыкненні ў спрэчным рэгіёне не пачаліся б без актыўнага садзейнічання Турцыі. З яго слоў, Баку на працягу 15 гадоў пагражаў увесці войскі ў Нагорны Карабах, але да актыўных дзеянняў перайшоў пасля атрымання падтрымкі Анкары.