Чэхія выдзеліць грошы на навучанне беларускіх студэнтаў

• 6.10.2020, 16:31

На кожнага студэнта выдзеляць амаль 5500 еўраў.

На фоне пратэстаў у Беларусі Мінадукацыі Чэхіі пастанавіла выдзеліць сродкі на навучанне ў чэшскіх ВНУ беларускіх студэнтаў.

Міністэрства адукацыі Чэхіі наважыла выдзеліць сродкі на навучанне ў чэшскіх ВНУ беларускіх студэнтаў на фоне пратэстаў, якія праходзяць у Беларусі супраць аўтарытарнага рэжыму Аляксандра Лукашэнкі, паведамляе radio.cz.

На кожнага студэнта на адзін акадэмічны год Мінадукацыі выдзеліць ВНУ да 150 000 крон (амаль 5 500 еўраў). Сродкі будуць накіроўвацца як на прыём новых студэнтаў у ВНУ, так і на кароткатэрміновыя стажыроўкі навучэнцаў, - на гэтыя мэты будзе выдзяляцца па 15 000 крон (блізу 550 еўраў).

«Пастанову аб наданні гэтай падтрымкі мы прынялі ў сувязі з цяперашняй сітуацыяй у Беларусі. Яна будзе прызначаная ў тым ліку студэнтам, якія ў гэты момант асцерагаюцца прадаўжаць вучобу ў Беларусі, а таксама тым, хто пазбавіўся магчымасці атрымліваць там вышэйшую адукацыю», - паведамляе намеснік міністра працы з ВНУ Павел Долечак.

Ці падыходзіць той ці іншы студэнт пад катэгорыю нястачы і дапамог, будзе вызначаць сама навучальная ўстанова. Гэта можа быць зроблена на падставе перапіскі ці гутаркі з прэтэндэнтам.