Літва адклікае амбасадара ў Беларусі для кансультацый

• 5.10.2020, 20:34

Пастанова аб адклiканнi амбасадара прынятая пасля абмеркавання гэтага пытання з Варшавай.

Літва прыняла пастанову аб адклiканнi свайго амбасадара ў Беларусі для кансультацый.

«Нашай мэтай з'яўляецца максімальнае захаванне дыпламатычных кантактаў. Пра гэта мы апавясцілі і беларускі бок, з якім дамовіліся, што часовае адкліканне амбасадара для кансультацый паслужыць памяншэнню напружанасці і будзе спрыяць захаванню дыпламатычнага прадстаўніцтва на ўзроўні амбасадараў», - прыводзяцца ў паведамленні словы кіраўніка літоўскай дыпламатыі Лінаса Лінкявічуса.

Пастанова аб адклiканнi амбасадара прынятая пасля абмеркавання гэтага пытання з Варшавай. Як паведаміў Лінкявічус, пра тое, каб не скарачаць дыпламатычны персанал, дамовіцца пакуль не ўдалося. «Калі Беларусь па-ранейшаму будзе на гэтым намагаць, мы прымем адэкватныя люстраныя меры», - заявіў ён.

Нагадаем, Беларусь адклікала сваіх амбасадараў з Польшчы і Літвы, а таксама запатрабавала ад гэтых краін скараціць свае дыпламатычныя прадстаўніцтвы.