Армія Азербайджана абстрэльвае Карабах беларускімі «Паланэзамі»
- 5.10.2020, 19:55
Як канфлікт у Карабаху паўплывае на адносіны Беларусі з Арменіяй і Азербайджанам?
Як беларускія ракеты трапілі ў Азербайджан і як канфлікт у Карабаху паўплывае на адносіны Беларусі з Арменіяй і Азербайджанам? Пра гэта распавядае «Радыё Свабода» незалежны вайсковы аглядальнік Аляксандар Алесін.
Алесін называе дамову аб продажы беларускіх «Паланэзаў» Азербайджану «чыстай», але прызнае, што яна «падкінула дроў» у канфлікт паміж дзвюма краінамі, які не згасае ўжо 30 гадоў.
«Так, ужо ёсць афіцыйныя пацверджанні, што нашы «Паланэзы» выбухаюць на тэрыторыі Карабаха - азербайджанскія вайскоўцы страляюць па пазіцыях арміі самаабвешчанай Нагорна-Карабахскай Рэспублікі, і там гінуць мірныя жыхары. Сумна, але факт», - уважае Аляксандр Алесін.
«Паланэзы» былі прададзеныя Азербайджану два гады таму. Азербайджан заплаціў 160 мільёнаў даляраў за 10 установак залпавага агню і адпаведнае абсталяванне, прычым усе грошы былі пералічаныя загадзя.
«Гэта ўжо дэманструе ступень даверу паміж рэжымамі дзвюх краін. Цяпер разам з ізраільскімі ракетамі «Лора» беларускія «Паланэзы» з'яўляюцца самай дальнабойнай зброяй Азербайджана, таму што яны ляцяць на 300 кіламетраў, яны могуць страляць па тэрыторыі Карабаха з усіх бакоў», - сказаў Аляксандр Алесін.
Паводле Аляксандра Алесіна, фармальна дамова аб продажы беларускіх «Паланэзаў» Азербайджану лічыцца законнай, бо Азербайджан не ваяваў з Арменіяй, а значыць, Беларусь не парушыла сваіх абавязкаў не распальваць вайсковыя канфлікты.
«Але маральны момант, безумоўна, прысутнічае. Бо яшчэ адзін канфлікт паміж гэтымі народамі, якому больш за 30 гадоў, так і не развязаны, і продаж зброі відавочна не спрыяе гэтаму. Іронія сітуацыі ў тым, што міжнародны орган па ўрэгуляванні канфлікту ў Карабаху называецца «Менская група», але высвятляецца, што цяпер пра гэту групу трэба забыцца, канчаткова высветлілася, што яна нічога не развязвае», - сказаў экспэрт.
Паводле Аляксандра Алесіна, Беларусь і раней прадавала зброю Азербайджану.
«Прадаваліся танкі, дальнабойная артылерыя, боепрыпасы», - сказаў экспэрт, адзначыўшы, што другому боку канфлікту, Арменіі, таксама шмат разоў прадавалася зброя з Беларусі.
У тым ліку продаж боепрыпасаў, якімі цяпер абараняецца Карабах. З Арменіяй у Беларусі пастаяннае вайсковае супрацоўніцтва, думаю, цяпер яно не спынілася».
Ці не распадзецца АДКБ?
Арменія, як і Беларусь, з'яўляецца сябрам АДКБ, вайсковай арганізацыі былых савецкіх рэспублік, звязаных Дамовай аб калектыўнай бяспецы. Азербайджан да пагаднення не далучыўся. Як факт выбуху беларускіх ракет у Карабаху паўплывае на сітуацыю ўнутры АДКБ?
«Я не думаю, што Арменія будзе выстаўляць якія-небудзь прэтэнзіі да Беларусі праз «Паланэзы», - сказаў Аляксандр Алесін, адзначыўшы, што Расея прадала ў 10 разоў больш зброі Азербайджану, але гэта не перашкодзіла ўдзелу Арменіі ў АДКБ.
«Наадварот, цяпер Арменія больш цікавіцца Масквой, чым раней. Калі да ўлады прыйшоў Нікал Пашынян, ён заняў больш жорсткую пазіцыю, чым яго папярэднікі ў кантактах з Масквой. Але цяпер, думаю, ён стане мякчэйшы, таму што яму як ніколі патрэбна вайсковая і палітычная дапамога Масквы. Што да Беларусі, то тут пазіцыя не зменіцца, бо Беларусь застаецца трывала звязанай з Масквой і ўжо гэтым карысная Арменіі», - мяркуе Аляксандр Алесін.
Паводле Аляксандра Алесіна, Баку таксама зацікаўлены ў працягу кантактаў з Менскам.
«Беларусь прадае Азербайджану шмат сельгастэхнікі, купляе там нафту. Ёсць шмат сувязяў, якія складана разарваць», - уважае Аляксандр Алесін.
Беларускія «Паланэзы» вырабляюцца на заводзе ў Дзяржынску, а шасі да іх - на заводзе колавых цягачоў у Менску. Цяпер беларускія спецыялісты працуюць над новай версіяй ракет для «Паланэзаў». Імаверна, гэта зацікавіць Савудаўскую Арабію, якая замовіла падобныя ўстаноўкі ва Украіне, але ўгода яшчэ не складзеная.