Літва адклікае яшчэ шэсць дыпламатаў з Беларусі

• 12.10.2020, 19:00

МЗС Літвы прыняло пастанову адклікаць яшчэ шэсць сваіх дыпламатаў з Менска і Горадні.

«Улічваючы ультыматыўныя патрабаванні і адкліканне яшчэ шасці дыпламатаў з Менска і Горадні, мы імкнёмся спыніць працэс абмежавання дыпламатычных кантактаў», - паведаміла агенцтву BNS прадстаўнік МЗС Літвы ў сувязях з грамадскасцю Раса Якілайтэне.

«Беларускі бок не ўлічыў нашы кампрамісныя прапановы і працягвае ультыматыўна патрабаваць скарачэння колькасці літоўскіх дыпламатаў, а калі мы не пагадзіліся, то дыпламатаў, якія працуюць у Беларусі, мелі намер абвясціць персона нон грата, што значна абмежавала б магчымасці дыпламатаў працаваць у будучыні», - сказала Якілайтэне.

Яна звярнула ўвагу на той факт, што міністры замежных спраў краін ЕЗ у панядзелак падтрымалі прынцыповую пастанову пашырыць спіс афіцыйных асоб Беларусі, якія трапляюць пад санкцыі, яшчэ на 10 чалавек, у тым ліку Лукашэнка.

2 кастрычніка Беларусь адклікала амбасадараў з Вільні і Варшавы і заклікала Літву з Польшчай адклікаць сваіх амбасадараў з Менска, а таксама скараціць колькасць дыпламатычнага персаналу, ад Літвы запатрабавалі адклікаць 11 дыпламатаў, ад Польшчы - 32.