NYT: Паўстанні ў Беларусі і Кыргызстане і вайна на Каўказе падрываюць уплыў Пуціна
- 11.10.2020, 20:25
Для Масквы ў гэтых канфліктах няма нічога добрага.
"У самаабвешчанай расейскай сферы ўплыву Расея свой уплыў страчвае. Адначасовыя крызісы ў Беларусі, Цэнтральнай Азіі і на Каўказе заспелі Крэмль знянацку, прымусіўшы яго з усіх сіл імкнуцца ўмацаваць інтарэсы Расеі ў былых савецкіх рэспубліках і падарваўшы імідж прэзідэнта Уладзіміра Пуціна як майстра-тактыка на сусветнай арэне", - піша The New York Times (пераклад - inopressa.ru).
"Для Масквы ў гэтых канфліктах няма нічога добрага, - мяркуе Канстанцін Затулін, высокапастаўлены расейскі парламентарый і хаўруснік Пуціна, які спецыялізуецца на дачыненнях з тым, што расейцы называюць "блізкім замежжам".
"Пуцін выдаткаваў гады на тое, каб ператварыць Расею ў глабальную дзяржаву, запусціўшы руку ў гарачыя мясціны ад Лацінскай Амерыкі да Блізкага Усходу, і нават ўмешваючыся ў прэзідэнцкія выбары ў Злучаных Штатах. Але, гадамі працуючы над дэстабілізацыяй Захаду, ён раптам апынуўся ў асяроддзі нестабільнасці; калісьці ўважаўся за спрытнага ў міжнародных справах, ён, здаецца, страціў былую хватку", - гаворыцца ў артыкуле.
Выданне нагадвае, што "ў Беларусі Пуцін (...) падтрымаў непапулярнага аўтакрата краіны, Аляксандра Лукашэнку, што павярнула грамадскую думку супраць Расеі ў краіне, якая раней была самай сяброўскай Расеі краінай Еўропы. У Кыргызстане пратэстоўцы на гэтым тыдні, відавочна, апынуліся на грані зрынання прэзідэнта Сааранбая Жээнбекава, менш чым праз два тыдні пасля таго, як Пуцін паабяцаў яму на рэдкай асабістай сустрэчы, што "мы са свайго боку будзем рабіць усё для таго, каб падтрымаць Вас як кіраўніка краіны". А на Каўказе зацяжны канфлікт паміж Арменіяй і Азербайджанам праз анклава Нагорны Карабах на мінулым тыдні перарос у самыя жорсткія баявыя дзеянні з 1990-х гадоў, пагражаючы звесці на нішто кампраміс, які дазволіў Расеі культываваць разнастайныя сувязі з рэгіёнам".
"Расея рабіла ўсё магчымае, каб падтрымліваць сувязі як з Азербайджанам, так і з Арменіяй, - указаў Затулін. - Кожны дзень канфлікту ў Карабаху, фактычна, робіць унёсак у абнуленне аўтарытэту Расеі".
"(...) Са слоў крытыкаў, Расея, і яе суседзі былі дэстабілізаваныя пандэміяй каранавіруса, якая выклікала недавер да інстытутаў і адарваных ад рэчаіснасці лідараў ва ўсім рэгіёне. Пандэмія ўнесла ўклад у разбурэнне далікатнага замірэння паміж Азербайджанам і Арменіяй, а ў Беларусі і Кыргызстане хвароба падрыхтавала глебу для грамадскіх паўстанняў, выкрыўшы кіроўную эліту як адарваную ад пакут людзей (...)", - піша газета.
"У Расеі эканамічныя цяжкасці, выкліканыя пандэміяй, пагоршылі грамадскую незадаволенасць Пуціным. Напрыклад, у далёкаўсходнім горадзе Хабараўск тысячы пратэстоўцаў, разгневаных арыштам папулярнага губернатара, выйшлі на вуліцы ў мінулую суботу ўжо 13-ы тыдзень запар".
"Некаторыя аналітыкі кажуць, што грамадская незадаволенасць у Расеі азначае, што Пуціну трэба звярнуць больш увагі на ўнутраныя праблемы, такія як эканамічныя цяжкасці, забруджванне навакольнага асяроддзя і дрэнную ахову здароўя, замест таго, каб паглыбляцца ў глабальную геапалітыку. Але падзеі апошніх тыдняў далі Пуціну больш падстаў засяродзіцца на апошняй. "Для Пуціна практычна ўся ягоная місія і ягонае бачанне расейскага велічы і поспеху круцяцца вакол яго замежнапалітычнай праграмы, - кажа Таццяна Станавая, навуковая супрацоўніца Маскоўскага цэнтра Карнегі (...). Новая серыя крызісаў, працягнула яна, "вельмі моцна адцягне Пуціна ад унутраных праблем".
(...) "Са слоў Айбек Султангазіева, дырэктара кіргізскага інфармацыйнага агенцтва K-News, калі паўстанне ў ягонай краіне будзе мець поспех, новае кіраўніцтва будзе імкнуцца падтрымліваць шчыльныя сувязі з Масквой. У Арменіі таксама ўрад прэм'ер-міністра Нікола Пашынян захаваў саюз з Расеяй пасля таго, як прэм'ер-міністр прыйшоў да ўлады ў выніку народнага паўстання ў 2018 годзе. "Мы ніколі не былі празаходнімі або праўсходнімі, - заявіў Рубен Рубінян, кіраўнік камітэта замежных спраў парламента Арменіі. - Расея была і застаецца хаўруснікам Арменіі, вельмі важным хаўруснікам ".
"Але для Масквы нядаўнія падзеі ў Беларусі прапануюць павучальную гісторыю, якая ілюструе далікатнасць становішча Расеі сярод яе суседзяў (...). Некаторыя беларусы, якія былі добразычліва настроеныя ў дачыненні да Пуціна, сталі супраць яго пасля таго, як ён падтрымаў Лукашэнку перад тварам пратэстаў", - падкрэслівае выданне.
"Затулін, расейскі дэпутат, сказаў, што чыноўнікі "на самым высокім узроўні Расейскай Федэрацыі" мяркуюць, што "рана ці позна" Лукашэнку давядзецца сысці ў адстаўку. Але Лукашэнка ўказаў расейскім чыноўнікам, кажа Затулін, што ягоны сыход перад тварам вулічных пратэстаў можа стварыць небяспечны прэцэдэнт для таго, што можа здарыцца з самім Пуціным".
"Безумоўна падтрымліваючы Лукашэнку, мы ствараем для сябе велізарную праблему ў будучыні з большасцю ці значнай часткай беларускага насельніцтва, - адзначыў Затулін. - Мы ствараем сабе праблему з іншымі беларускімі палітыкамі і грамадскімі дзеячамі, якія ўсё часцей вымушаны шукаць спагады на Захадзе. Расея хоча гэтага менш за ўсё".