Эштан занепакоеная станам дэмакратыі ва Украіне і Беларусі
- 28.09.2011, 10:27
Вярхоўны прадстаўнік ЕЗ па пытаннях сумеснай знешняй палітыкі і палітыкі бяспекі Кэтрын Эштан напярэдадні саміту «Усходняга партнёрства» выказала занепакоенасць дэмакратыяй ва Украіне і Беларусі.
Як перадае УНІАН, аб гэтым Кэтрын Эштан заявіла напярэдадні ў Страсбургу на слуханнях у Еўрапарламенце.
Кэтрын Эштан, у прыватнасці, нагадала, што ў пачатку верасня ўжо накіравала жорсткае пасланне Украіне, у якім падкрэсліла, што павага дэмакратычна прынцыпаў і вяршэнства права, уключаючна з правам на незалежны і сумленны судовы працэс, застаюцца асновай адносінаў ЕЗ-Украіна.
«(Камісар ЕЗ па пытаннях пашырэння і Еўрапейскай палітыкі суседства) Стэфан Фюле (Stefan Fule) і я, у прыватнасці, занепакоеныя справамі супраць Юліі Цімашэнка і іншых прадстаўнікоў ейнага ўрада, а таксама планамі вярнуцца да старой выбарчай сістэмы, нягледзячы на міжнародныя парады», - заявіла Кэтрын Эштан.
Яна таксама нагадала, што пасля ўсплёску палітычных рэпрэсій у Беларусі ў снежні мінулага года ЕЗ неадназначна прадэманстраваў сваю пазіцыю, увёўшы санкцыі супраць рэжыму і узмацніўшы супрацоўніцтва з прадстаўнікамі грамадзянскай супольнасці.
«У Польшчы (саміт «Усходняга партнёрства» пройдзе ў Варшаве) мы не пакінем сумневаў нашым партнёрам адносна таго, што прызнанне з боку ЕЗ іх еўрапейскіх імкненняў і іхняга еўрапейскага выбару ідзе нага ў нагу з нашымі чаканнямі ў дачыненні да іх абавязальніцтваў здзяйсняць прагрэс на шляху да глыбокай і стабільнай дэмакратыі», - падкрэсліла Кэтрын Эштан.
Яна адзначыла, што на сённяшні дзень ўсходнія партнёры ЕЗ знаходзяцца на розных этапах шляху да дэмакратыі, і падкрэсліла, што ЕС павінен даць ім практычную дапамогу ў працэсе палітычнай асацыяцыі і эканамічнай інтэграцыі.
Саміт «Усходняга партнёрства» адбудзецца 29-30 верасня ў Варшаве. Гэтая ініцыятыва была распачатая ў маі 2009 года і накіравана на ўзмацненне супрацоўніцтва ЕЗ з усходнімі суседзямі: Азербайджанам, Арменіяй, Беларуссю, Грузіяй, Малдовай і Украінай.