Фізасобам могуць дазволіць прадаваць машыны толькі раз у 3 гады
- 4.05.2010, 14:36
Беларускія ўлады могуць пайсці на такое непапулярнае рашэнне нібыта для захавання пошлін на імпартаваныя аўтамабілі.
Стаўкі мытных пошлін на імпартаваныя аўтамабілі для фізічных асоб у Беларусі могуць захавацца на цяперашнім узроўні з правам продажу машыны раз у тры гады, пры продажы раней трох гадоў трэба будзе выплаціць пошліны па стаўцы як для юрыдычных асобаў. Такая прапанова зараз абмяркоўваецца краінамі-удзельніцамі Мытнага саюза / Беларусь, Расія, Казахстан / і рыхтуецца да разгляду 21 мая на ўзроўні кіраўнікоў урадаў на пасяджэнні Міждзяржаўнага савета ЕўрАзЭС, вышэйшага органа Мытнага саюза. Пра гэта агенцтву ПРАЙМ-ТАСС паведаміў прадстаўнік экспертнай групы адной з краін-удзельніц перамоваў.
Зараз у Беларусі фізасобы могуць завезці аўтамабіль з выплатай паніжаных ставак мытных пошлін раз у год.
«У апошні час прадстаўнікі мытнага ведамства Беларусі неаднаразова публічна выказваліся ў карысць захавання дзеючага памеру ставак на аўтамабілі для фізасоб, аргументуючы гэта тым, што грамадзяне краіны змогуць дазволіць сабе жаданы аўтамабіль, а эканоміка атрымае ад гэтага дадатковыя фінансавыя патокі ад мытных пошлін, продажу бензіну, паслуг СТА. Пры гэтым беларускі бок робіць некаторы крок насустрач Расійскай Федэрацыі, прапаноўваючы дазволіць продаж аўтамабіля фізасобам не раней трох гадоў», - пракаментаваў гэтыя прапановы суразмоўца агенцтва.
Як раней заявіў намеснік старшыні ДМК Беларусі Леанід Досаў, «пытанне аб увазных пошлінах на аўтамабілі для фізасоб у рамках Мытнага саюза павінна быць вырашана да 1 ліпеня 2010 г, аднак ДМК Беларусі плануе ўрэгуляваць яго ўжо ў траўні, зыходзячы з інтэнсіўнасці ідучых перамоваў».
Такім чынам, беларускі бок чакае рашэння гэтага пытання 21 траўня на пасяджэнні Міждзяржсавета ЕўрАзЭС.
Імпарт легкавых аўтамабіляў у Беларусь у першым квартале 2010 г вырас на 14% у параўнанні з студзенем-сакавіком 2009 г да 44,5 тыс адзінак. У грашовым выражэнні імпарт павялічыўся на 13% да 267 млн. дал, паводле папярэдніх дадзеных мытнай статыстыкі. Практычна ўвесь аб'ём імпарту / 98% / забяспечылі фізасобы. Яны павялічылі імпарт легкавых аўтамабіляў у студзені-сакавіку 2010 г у 2 разы да паказчыку першага квартала 2009 г да 43,6 тыс адзінак, у грашовым выражэнні імпарт аўтамабіляў фізічнымі асобамі вырас таксама ў 2 разы да 258,1 млн. дал Па выніках студзеня-сакавіка юрасобы завезлі ў Беларусь толькі 860 аўтамабіляў /у 20 разоў менш, чым у студзені-сакавіку 2009 г/, у тым ліку 346 - з-за межаў СНД.
Асноўным фактарам карэннага змянення сітуацыі з імпартам аўтамабіляў стала ўвядзенне з 1 студзеня 2010 г адзінага мытнага тарыфу для Рэспублікі Беларусь, Рэспублікі Казахстан і Расійскай Федэрацыі, паводле якога мытныя пошліны на імпарт аўтатранспарту беларускімі юрасобамі былі паднятыя да ўзроўню расійскіх, для фізасоб - засталіся на ўзроўні 2009 г.