У менскім метро з-за выбухаў у Маскве ўзмоцненыя меры бяспекі
- 29.03.2010, 10:00
Па словах прадстаўнікоў МУС, увесь міліцэйскі склад выйшаў на лініі метрапалітэна.
Міліцыя Менскага метрапалітэна ўзмоцніла меры бяспекі ў сувязі з выбухамі ў маскоўскім метро, паведаміў «Інтэрфаксу» прэс-афіцэр аддзела ўнутраных справаў па ахове Менскага метрапалітэна Арцём Гарашэвіч.
«У сувязі з маскоўскімі падзеямі прынятае рашэнне ўзмацніць меры бяспекі ў Менскім метрапалітэне», - паведаміў Гарашэвіч.
Паводле яго словаў, «для аховы метрапалітэна выведзеныя дадатковыя міліцэйскія сілы, ўзмоцненае патруляванне на перасадачных і канечных станцыях метрапалітэна».
«Увесь афіцэрскі склад і кіраўніцтва АУС па ахове метрапалітэна выйшлі на лініі», - адзначыў прэс-сакратар.
Нагадаем, што на гэты момант ужо вядома пра 40 загінулых пасля серыі выбухаў у маскоўскім метрапалітэне, якія адбыліся 29 сакавіка.