На мяжы сталі часцей канфіскоўваць аўтамабілі
- 9.02.2010, 17:54
З-за будучага падвышэння мытных тарыфаў беларусы ў спешцы набываюць за мяжой крадзеныя аўто.
На польска-беларускай мяжы пачасціліся выпадкі канфіскацыі легкавых аўтамабіляў, што ўвозяцца беларускімі грамадзянамі з краін Еўразвяза. Пра гэта БелТА паведамілі ў Генеральным консульстве Беларусі ў Беластоку.
Цяперашнія мытныя пошліны на ўвоз аўтамабіляў фізічнымі асобамі для асабістага карыстання будуць дзейнічаць у Беларусі толькі да 1 ліпеня 2010 года. Многія беларускія грамадзяне спяшаюцца набыць за мяжой, у прыватнасці ў краінах ЕЗ, былыя ва ўжыванні аўто і ўнесці мытныя плацяжы яшчэ па цяперашніх адзіных стаўках. Аднак, як звяртаюць увагу ў Генконсульстве Беларусі ў Беластоку, не ўсе ўважліва выбіраюць прадаўцоў, з-за чаго ўжо пры вывазе набытых аўтамабіляў з тэрыторыі Польшчы сутыкаюцца з праблемамі. Справа ў тым, што частка аўтамабіляў, якія ідуць з ЕЗ, лічыцца ў крадзяжы і знаходзіцца ў агульнаеўрапейскім ці міжнародным вышуку.
Як падкрэслілі ў Генконсульстве, супрацоўнікі мытных і памежных службаў Польшчы пры вывазе аўтатранспартных сродкаў за межы ЕЗ дастаткова дбайна ажыццяўляюць агляд і праверку як дакументаў на транспартныя сродкі, так і нумароў на кузаве. «Пасля выяўлення, напрыклад, пашкоджанняў на нумары кузава аўтамабіль тут жа канфіскуецца, - адзначылі ў Генконсульстве. - Больш за тое, згодна з польскім заканадаўствам, перавоз такога транспартнага сродку трактуецца як пасярэдніцтва ў злачынстве, цягне за сабой пакаранне ажно да крымінальнага альбо прадугледжвае штрафы, а пры адмове выплаты штрафаў - часовае затрыманне грамадзян тэрмінам да трох месяцаў».
У сувязі з гэтым беларускія дыпламаты ў Беластоку, якія сутыкаюцца з павелічэннем колькасці зваротаў грамадзян Беларусі з гэтай нагоды, заклікаюць больш уважліва выбіраць былыя ва ўжыванні аўтамабілі, у прыватнасці ў краінах ЕЗ. Выязджаючы за мяжу, у тым ліку і з мэтай набыцця транспартнага сродку, варта ўважліва вывучыць заканадаўства краіны знаходжання.