Станіслаў Шушкевіч і Вацлаў Гавал сустрэліся ва Вроцлаве
- 4.06.2009, 15:52
У Польшчы адбылося ўручэнне прэміі імя Яна Новака-Езеранскага за асаблівы ўнёсак у будаўніцтва дэмакратыі і абарону правоў чалавека.
Гэтая ўзнагарода была заснаваная 4 чэрвеня 2004 года вядомым грамадскім дзеячам, былым дырэктарам польскай службы «Радыё Свабода» Янам Новакам-Езеранскім, прэзідэнтам Вроцлава і Калегіяў Усходняй Еўропы. Традыцыйна ўзнагарода ўручаецца 4 чэрвеня ва ўгодкі першых дэмакратычных выбараў у Сойм у 1989 годзе, паведамляе прэс-служба грамадзянскай кампаніі «Еўрапейская Беларусь».
Прэміяй імя Яна Новака-Езеранскага ганаруюцца людзі ці ўстановы, якія зрабілі істотны ўнёсак у будаўніцтва дэмакратыі і абарону правоў чалавека. Першым яе лаўрэатам у 2004 годзе стаў першы прэм'ер-міністр пасля ІІ Сусветнай вайны некамуністычнага ўрада Польшчы Тадэвуш Мазавецкі. У 2005 годзе прэмію атрымаў былы прэзідэнт ЗША Джордж Буш. У 2006 годзе ёй быў уганараваны экс-спікер беларускага парламента Станіслаў Шушкевіч. У 2007 годзе прэмію атрымаў расейскі праваабаронца Сяргей Кавалёў, а ў 2008-м - французскі кардынал Жан-Мары Люсцігер.
Сёлета Станіслаў Шушкевіч уручыў прэмію экс-прэзідэнту Чэхіі Вацлаву Гавалу.
Як паведаміў Станіслаў Шушкевіч, «сёлета ўручэнне прэміі імя Яна Новака-Езеранскага праходзіла ў месцы, якое называецца Asalineum. Гэта старая сядзіба польскіх магнатаў. Цяпер яна з'яўляецца часткай Вроцлаўскага ўніверсітэта - вельмі цікавае месца і багатае гісторыяй. Сярод рукапісаў шматлікіх паэтаў і пісьменнікаў там таксама знаходзяцца рукапісы Адама Міцкевіча».
Таксама ён адзначыў:
– Падчас уручэння мы шмат размаўлялі са спадаром Гавалам - пра сітуацыю ў Беларусі, Польшчы, Чэхіі. Пра сітуацыю ў свеце і вакол нашых краінаў. Вацлаў Гавал - вельмі інтэлігентны і разумны чалавек. Прыемна было і тое, што таксама на ўзнагароджанні прысутнічаў Адам Міхнік - шматгадовы дысідэнт, а зараз - галоўны рэдактар самай буйной польскай «Газеты Выборчай».
– Наколькі Вацлаў Гавал цікавіцца тым, што адбываецца ў Беларусі?
– Спадар Гавал шмат займаецца пытаннямі дэмакратыі і правоў чалавека ў розных краінах. Цікавіцца ён і беларускай сітуацыяй, добра яе ведае, сустракаецца з беларускімі апазіцыянерамі і грамадскімі дзеячамі. Падчас нашай сустрэчы ён казаў, што адчувае асаблівую адказнасць за прасоўванне каштоўнасцяў дэмакратыі і правоў чалавека ў свеце.