Сярэдні чэк у цэнтральнай краме Баранавічаў складае менш за 1 даляр

• 22.05.2009, 9:05

Людзі вымушаныя эканоміць нават на ежы, а судзячы па памерах пакупак – практычна галадаць.

У Еўропе гандляры назіраюць паніжэнне пакупальніцкай здольнасці. Нашыя гастраномы і ўніверсамы пакуль не скардзяцца на рэзкае паніжэнне тавараабароту, але адзначаюць, што пакупнікі паступова мяняюць артыкулы выдаткаў, піша газета «Intex-press».

Харчовыя прыхільнасці пакупнікоў у Баранавічах перакінуліся на непатрабавальную ежу і танны алкаголь. Як распавялі ў краме «Прадсервіч», у красавіку значна выраслі продажы расліннага алею (на 57%), курынага мяса (на 22%) і макаронаў (на 5%). З пачатку года на траціну выраслі аб'ёмы продажаў пладова-ягаднага віна. Затое даражэйшы і якасны алкаголь застаўся незапатрабаваным - паменшыліся продажы каньяку (на 14%), слабаалкагольных напояў (на 13%) і нават гарэлкі (на 1%).

У першую чаргу людзі сталі эканоміць на сметанковым масле, цукры і муцэ. Па дадзеных дырэктара крамы «Прадсервіс» Алены Мяць, аб'ёмы продажаў гэтых прадуктаў у красавіку ў параўнанні са студзенем паменшыліся ў сярэднім на 15-20%. Паменшыліся таксама продажы кандытарскіх вырабаў ( на 14%), сыроў (на 13%), круп (на 11%), а таксама кілбасных вырабаў (на 9%).

На фоне росту коштаў гараджане сталі больш акуратнымі ў сваіх тратах. Як адзначаюць у некаторых крамах горада, выдаткі на харчаванне ў красавіку засталіся амаль на тым жа ўзроўні, што і ў студзені, і сярэдні чэк за апошнія чатыры месяца малаважна змяніўся. Напрыклад, у краме «Прадсервіс» у Паўднёвым мікрараёне сярэдняя пакупка ў красавіку вырасла на 1 рубель у параўнанні з пачаткам года і склала 12 665 руб. Аднак з улікам росту коштаў на прадукты харчавання бачна, што пакупальніцкая здольнасць людзей упала.

Гэта здаецца неверагодным, але ў самым цэнтры горада купляюць мала. Сярэдні чэк у краме «Цэнтральны» у красавіку склаў усяго 2 470 руб. Пакупнікі сталі траціць менш, чым раней. «Купляюць у асноўным па дробязі, - заўважыў адзін з працаўнікоў крамы. - Адны хлеб, соль купяць, іншыя - пачак семечак. Буйныя пакупкі для нашай крамы ўжо ў мінулым».

Дарэчы, не толькі жыхары горада Баранавічы сталі эканоміць. Паніжэнне аб'ёмаў продажаў канстатуюць нават у сталіцы. Як адзначае «Еўрарадыё», сярэдні чэк у гіпермаркеце «Гіпа» вырас за кошт росту коштаў, а не за кошт павелічэння куплі і склаў 11 тыс. руб. (усяго каля 4 даляраў). Пры беларускіх коштах, якія часта бываюць вышэй, чым у суседніх Польшчы, Украіне і нават Маскве, гэта значыць, што людзі сапраўды пачынаюць галадаць.