Каб выкладаць гісторыю Беларусі на беларускай мове, трэба атрымаць згоду бацькоў
- 14.11.2008, 12:58
Больш таго, з з-за скарачэння гадзін школьнікі будуць вывучаць гісторыю сваёй краіны толькі з трэцяй чвэрці.
10- і 11-класнікі нават яшчэ не вывучалі гісторыю Беларусі ў гэтым годзе. І, як даведалася “Еўрарадыё”, гэта яшчэ не ўсе "асаблівасці" вывучэння гісторыі Беларусі пасля рэформы
Намесніца дырэктара школы №52 Валянціна Петрыкевіч кажа, што год таму гісторыя Беларусі вывучалася 34 гадзіны ў год. Сёння ад яе засталося толькі 19 гадзін.
"Гісторыя Беларусі ва ўсіх школах з гэтага года будзе вывучацца з трэцяй чвэрці адну гадзіну ў тыдзень. 19 тыдняў — значыць, дзевятнаццаць гадзін. Раней таксама была адна гадзіна ў тыдзень, але гэта было на працягу ўсяго года. У нас было 34 тыдні вучэбных", -- паведаміла настаўніца.
Паводле слоў выкладчыка ліцэя горада Барань Таццяны Лабанавай, у 10-м класе гісторыя Беларусі вывучаецца пачынаючы з перыяду… Беларусь у складзе Расійскай імперыі!
"А паўтарэнне ? вось гэта ў іх прапушчана. То бок, яны толькі XIX і ХХ стагоддзі пачынаюць ? Беларусь у складзе Расійскай імперыі", -- кажа яна.
Як удакладняе настаўнік Талькаўскай сярэдняй школы Наталля Іллініч, сёння ў адзінаццатым класе праграму колішняга 10-га класа праходзяць "па вярхах".
"Проста аглядна. Каштоўнасці антычнага і старажытнага свету. За адзін урок тое, што мы раней праходзілі паўгода ў 10 класе", -- зазначае настаўніца.
"У выніку, калі ёсць жаданне ? можна самім паўтарыць", — кажа метадыст Мінскага гарадскога інстытута развіцця адукацыі Ларыса Жарко. Паводле слоў метадыста, на паўтарэнне гісторыі Беларусі да XIX стагоддзя ў праграме адводзіцца цэлыя 3 (!) гадзіны.
Аўтар школьнага падручніка па гісторыі Беларусі, выкладчык гістфаку БДУ Павел Лойка кажа, што і раней гісторыю вывучалі па-мінімуму. Што тады казаць пра тое, што адбываецца цяпер:
"Вядома, я гэта не вітаю. Я стаяў ля вытокаў, калі ўводзілі ў школах гісторыю Беларусі. Гэта быў яшчэ 93-ці год. Выбралі тое, што ў нас асобна будзе вывучацца сусветная гісторыя, асобна — гісторыя Беларусі. Іх і так, гэтых гадзін, было не так шмат - адзін урок на тыдзень. Гэта мінімум хаця б 1 гадзіна на тыдзень", -- кажа ён.
Зусім дзіўная сітуацыя, паводле слоў саміх выкладчыкаў, з вывучэннем гісторыі Беларусі на матчынай мове.
"Проста даходзіць да смешнага. Калі мы жадаем выкладаць па-беларуску, мы павінны атрымаць згоду бацькоў і дзяцей. А потым замовіць падручнікі на беларускай мове", -- паведаміла Таццяна Лабанава.