Тысячы студэнтаў маскоўскіх вну могуць быць адлічаныя з-за праблем з крэдытамі
- 14.10.2008, 12:11
З прычыны сусветнага фінансавага крызіса некалькі сотняў першакурснікаў вядучых вну Расеі могуць быць адлічаныя з-за праблем з крэдытаваннем. Адлічэнне яшчэ 2000 студэнтаў старэйшых курсаў пад пытаннем.
Праблемны банк "Саюз" перастаў пералічваць вну грошы па праграме крэдытавання студэнтаў, піша "Труд".
Як адзначае выданне, для шматлікіх таленавітых школьнікаў адукацыйныя крэдыты былі практычна адзіным шанцам атрымаць адукацыю ў 22 лепшых расейскіх вну. Адукацыйныя крэдыты ўзаконілі як асобны від крэдытавання ў 2000 годзе. Галоўнае іх адрозненне ад звычайных банкаўскіх пазык складаецца ў тым, што грошы трэба аддаваць толькі праз некалькі гадоў, калі вну будзе скончанае, а пазычальнік атрымае працу, якая добра аплочваецца.
У актыўную фазу гэтае распачынанне перайшло толькі ў пачатку 2007 года, калі Мінадукнавукі прапанавала выдаць праз банкаўскую сістэму каля 30 000 крэдытаў на агульную суму каля 6,5 млрд расейскіх рублёў. Выдаць банкі, праўда, змаглі толькі 10 000 крэдытаў, але і гэта нямала. Міністэрства разлічвала праз некалькі гадоў падцягнуць расейскую сістэму адукацыі да амерыканскай, дзе 2/3 студэнтаў вучацца ў крэдыт.
Найбуйнейшымі ўдзельнікамі праграмы сярод банкаў сталі Ашчадбанк, банкі "Саюз" і "Адукацыя". Каля 3500 студэнтаў найбуйнейшых маскоўскіх і рэгіянальных вну вучылася на платным аддзяленні на грошы банка "Саюз".
Банк "Саюз" выдаваў маладым людзям грошы на параўнальна ліберальных умовах. Пры афармленні патрабаваўся толькі пашпарт. У кампаніі былі прадстаўнікі ў асноўных маскоўскіх вну, якія раз у паўгады атрымлівалі грошы і правяралі, ці сапраўды студэнты-пазычальнікі працягваюць вучобу ў вну.
У верасні вялікая частка кліентаў "Саюза" - 2400 чалавек - не атрымалі чарговыя траншы. Іншыя банкі пакуль спраўна пералічваюць грошы і, больш за тое, прапаноўваюць крэдыты будучым абітурыентам. Так, банк BSGV і банк "Адукацыя" прапаноўвае пацярпелым студэнтам праграмы банка "Саюз" узяць новы крэдыт на імя бацькоў або любога сваяка, які працуе, пад 18% гадавых, гэта значыць у два разу даражэй, чым раней.
Паміж тым лёс такіх студэнтаў шмат у чым залежыць ад умоваў дамовы. Хутчэй за ўсё, банк у дамове пакідае за сабой магчымасць у аднабаковым парадку спыніць аказанне паслуг. Калі такой опцыі ў дамове няма, могуць праз суд прымусіць банк працягнуць крэдытаванне. У адваротным выпадку ў студэнтаў няма ніякіх гарантый.